अप्रकाशित पृष्ठ मी

 अप्रकाशित पृष्ठ मी

माझ्या व्यथा सांगू कुणा

शब्द अंधारात विरले

प्रस्तावना मागू कुणा

लेखणीतून रक्त उतरे

अक्षरे बंबाळली

मथळा लिहिण्यात माझे

हात ही रक्ताळले

ही कथा आहे तमाची

दृष्ये ही अंधारलेली

वाणी वैखरी नि:शब्द तरीही

गोष्ट ही साकारली

अल्प असती सौख्य अनुभव

म्हणुनी ते झुरती बघा

कल्पनेच्या कोंदणी

बघतात त्या उघड्या नभा

मी असा का रात्रवेडा

हाच वेडा प्रश्न आहे

माझिया नशिबी तमाचे

अतर्क्य ते साम्राज्य आहे

कवि 'रवि'