पुतीन... पुतीन... पुतीन

गेल्या दोन दिवसांपासून एक बातमी व्हायरल होत आहे ती अशी. " रशियाचे तहहयात राष्ट्रीय अध्यक्ष व्लादिमीर पुतीन यांचा मृत्यू झाला आहे आणि त्यांच्या जागेवर तोतया पुतीन कारभार करत आहे.

युद्धजन्य स्थिती मध्ये अशा प्रकारे छद्मी बातम्या पसरविणे हा देखील एक प्रकार आहे तो अनेक प्रसंगी आपल्या इतिहासात उपलब्ध आहे. महाभारताचे युद्ध सुरू असताना अजेय असलेल्या द्रोणाचार्यांना हतोत्साहित करण्यासाठी अश्वत्थामा मेला अशी आवई उठवली गेली. सत्यधर्मितेचा प्रतिक म्हणून ज्याची ख्याती अशा धर्मराज युधिष्ठिराला अश्वत्थामा मेला असं बोलायला सांगितले गेले पण तो तयार होईना, तेंव्हा 'अश्वत्थामा हतोहत:, नरोवा कुंजरोवा' अर्थात अश्वत्थामा मेला, माणूस किंवा हत्ती असं उच्चारून धर्मराजाने पळवाट वापरली. धर्मराजानेच अश्वत्थाम्याच्या मृत्यू ची वार्ता दिली हे ऐकून मग द्रोणाचार्य खचले आणि त्यांनी शस्त्र खाली ठेवून विलाप करीत प्राणार्पण केले. 

अशी अनेक उदाहरणे अलिकडच्या काळात देखील बघायला मिळतात. ऍडॉल्फ हिटलर, नेताजी सुभाषचंद्र बोस, ओसामा बिन लादेन, अल जवाहिरी आणि यांसारखी अनेक उदाहरणे उपलब्ध आहेत. ह्या मालिकेत आणखी भर पडली आहे ती व्लादिमीर पुतीन यांच्या नावाची. १०० दिवसांचे वर काळ लोटला आहे पण रशिया युक्रेन वर हल्ले करणे काही कमी करीत नाहीय. उलट युक्रेन ला मदत करणाऱ्या देशांना युद्धाची धमकी द्यायला कमी करीत नाहीय. अशावेळी छद्मी युद्धाचा प्रचंड अभ्यास असलेल्या युरोपियन देशांना हे असे प्रयोग करून रशियन जनतेला संभ्रमात टाकून काही साध्य होणार आहे कां ते बघायचे आहे. कोणत्याही देशाचा प्रमुख हा आपल्या देशातील जनतेच्या पाठिंब्यावर आपले निर्णय घेत असतो आणि ते राबवित असतो. पुतीन विरुध्द जनतेला अडकविण्यासाठी आधी अनेक प्रयत्न झाले आहेत. पण तेथील जनतेने दाद दिली नाही. आणि म्हणून आता पुतीनलाच मेलेला घोषित करून येन केन प्रकारे पुतीनचा सपोर्ट घटवता येतो कां ते तपासण्याची ही खेळी आहे याशिवाय दुसरे काही नाही. 

कारण असे की, 

१ युद्ध प्रसंगी रशियन राष्ट्राध्यक्ष कुणालाही दृष्टीस पडणे कठीण,     

२ पुतीनची सुरक्षा भेदून आरपार जाऊ शकेल अशी आजघडीला तरी एकही संस्था दिसत नाही

३ इतक्या दिवसांच्या युद्धानंतर सुद्धा रशियाने कुणाला मदत मागितली नाही. 

४ भारताच्या विदेशनीतिमध्ये कोणताही आकस्मिक बदल आढळला नाही.

५ चीन हा रशिया सोबत सहानुभूती बाळगून आहे तो राष्ट्राध्यक्ष पुतीन मुळेच. त्यांच्या नितीमध्ये सुद्धा काही फरक पडलेला दिसत नाही. 

अशी सगळी अवस्था असताना हाच निष्कर्ष काढणं क्रमप्राप्त आहे की पुतीन सुरक्षित आहे आणि रशियाची स्थितीही मजबूत आहे.

कवि'रवि'